Wikipedia é a maior obra colectiva na historia da humanidade, e unha vez máis a súa independencia está ameazada.
O Senado italiano está a discutir un proxecto de lei sobre a calumnia (Lei #3491). Se algunhas emendas (3.204, 3.400 e, especialmente, 3.207) se aprobasen, poderían obrigar a Wikipedia a corrixir ou borrar os seus contidos simplemente cunha solicitude por parte de quen os considere prexudiciais para a súa identidade ou privacidade. Os infractores poderían ser multados con 100 000 euros.
Wikipedia recoñece o dereito de cada individuo a salvagardar a súa reputación, e os voluntarios de Wikipedia traballan duramente para garantir este dereito; non obstante, se esta proposta fose aprobada, calquera frase en calquera artigo de Wikipedia podería enfrontarse a un borrado obrigatorio, sen importar a veracidade das afirmacións cuestionadas.
Esta medida minaría os principios fundamentais de Wikipedia; sería unha limitación inaceptable da súa independencia, e unha ameaza intimidatoria para o traballo dos seus 15 millóns de voluntarios en todo o mundo, os cales se verían na necesidade de evitar os artigos sobre determinados temas ou persoas, "simplemente para non se meter en problemas".
Nos últimos doce anos, Wikipedia converteuse en parte dos hábitos diarios de millóns de internautas que buscan unha boa fonte de coñecemento, gratuíta e baseada nos principios de neutralidade e liberdade de expresión.
A Wikipedia en italiano ten preto dun millón de artigos que reciben 16 millóns de visitas ao día, pero esta lei podería borralos todos, para sempre.
A enciclopedia libre é patrimonio de todos. Non deixemos que desapareza.
