incóra na vòlta l'indipendénsa dla Wikipedia l'è a risć.
In chi óri chè al Senàt itagliàṅ 'l è drē a discùtar un diśégn ad léǵ ch'al trata l'argumènt dla difamasiòṅ (DDL n. 3491) che, s'al fus apruâ, al prév custrìnśar tut i sit web (anc la Wikipedia) a curèśar o a scanślàr i sò artìcui, a basta sōl far la dmanda da part ad tut quéi ch'i pinsìsan che la sò figùra la fus misa in na luś catìva o anc sōl par di mutìṿ ad riservatésa, parvadénd la cundàna penàla e dal multi ch'i pōlan rivàr anc a 100 000 euro s'a n s i tira minga via.
La Wikipedia l'arcgnós al dirìt a diféndar la reputasiòṅ ad tut e i vuluntàri ch'i s daṅ da far a gràtis i gh ténan bèla a drē tut i dè par garantìr-la. L'apruvasiòṅ ad cla nòrma chè, cun tut qvést, la custrinśarév a métar maṅ a i cuntgnû sénsa dar a mènt a la véra. 'N òblig fat acsè 'l arvultarév ad paca i pilàstar fundamentài dla Wikipedia, la sarév na limitasiòṅ ch'la n s pōl mia cumpatìr par la sò autunumìa e na ména péśa p'r al lavōr di sò 15 migliòṅ ad vuluntàri stramnâ in tut al mónd, ch'i sarésan purtâ a dar-gh un taj a tgnir a drē a di argumènt particulàr o a di persunàǵ, anc sōl "p'r a n pasàr minga di guàj".
La Wikipedia l'è la più granda òpra dla stòria dal gèn'r umàṅ, misa in pē da tut: in 12 an l'à tacâ a far part dla vita ad migliòṅ 'd utènt dla Réda ch'i péscan un savēr minga ad part, a gràtis e, sóvra ad tut, lìbar. L'èdisiòṅ in dla léngua itagliàna l'à gh'à quàśi un migliòṅ ad vóś, ch'i ricévan 16 migliòṅ ad vìśiti tut i dè, ma cla nòrma lè la i prév inscurìr par sèmpar.
L'Enciclupedìa l'è 'n patrimòni ad tut. A n lasém briśa ch'la sparìsa.
